ലോകത്തിലെ ഏറ്റവും വലിയ നാഗപ്രതിമ കാണാം; കര്‍ണാടകയില്‍
നൂറ്റാണ്ടുകളായി നാഗാരാധന നിലനില്‍ക്കുന്ന ഒരു രാജ്യമാണ് നമ്മുടേത്. നിരവധി നാഗക്ഷേത്രങ്ങള്‍ അതിനു സാക്ഷ്യമെന്നോണം നമ്മുടെ നാട്ടില്‍ ഇന്നും നിലനില്‍ക്കുന്നുണ്ട്. ലോകത്തിലെ തന്നെ ഏറ്റവും വലിയ നാഗപ്രതിമ സ്ഥിതി ചെയ്യുന്ന ക്ഷേത്രം കര്‍ണാടകയിലാണ്. സവിശേഷതകള്‍ ഒരുപാടുള്ള മുക്തിനാഗ ക്ഷേത്രം ധാരാളം വിശ്വാസികളുടെ വലിയൊരാശ്രയമാണ്. ലോകത്തിലെ തന്നെ ഏറ്റവും പ്രശസ്തമായ നാഗക്ഷേത്രങ്ങളുടെ പട്ടികയില്‍ ആദ്യസ്ഥാനങ്ങളിലൊന്ന് അലങ്കരിക്കുന്ന ഈ ദേവാലയത്തിനു ധാരാളം പ്രത്യേകതകളുണ്ട്. എന്തൊക്കെയാണതെന്നു അറിയേണ്ടേ?
ബെംഗളൂരുവിലാണ് മുക്തി നാഗക്ഷേത്രം സ്ഥിതി ചെയ്യുന്നത്. ഇവിടുത്തെ ഏറ്റവും വലിയ പ്രത്യേകത പ്രധാന പ്രതിഷ്ഠ തന്നെയാണ്. ഒറ്റക്കല്ലില്‍ പണിതീര്‍ത്തിരിക്കുന്ന ഈ നാഗപ്രതിമയാണ് ലോകത്തിലേറ്റവും വലുത്. ഈ ഭീമാകാര നാഗരൂപത്തിനു 36 ടണ്‍ ഭാരവും 16 അടി ഉയരവുമുണ്ട്. ഈ ക്ഷേത്രവുമായി ബന്ധപ്പെട്ടുള്ള വിശ്വാസങ്ങള്‍ക്കു 200 വര്‍ഷത്തോളം പഴക്കമുണ്ടെങ്കിലും ഇപ്പോഴുള്ള ക്ഷേത്രത്തിനു അത്രയും വര്‍ഷത്തെ പഴക്കമൊന്നും അവകാശപ്പെടാനില്ല. കൗതുകം ജനിപ്പിക്കുന്ന നിര്‍മിതികളും പ്രതിഷ്ഠകളും ഈ ക്ഷേത്രത്തിന്റെ അകകാഴ്ചകളാണ്.
നാഗപ്രതിഷ്ഠ അല്ലാതെ വേറെയും ഒട്ടേറെ പ്രതിഷ്ഠകള്‍ ഇവിടെ കാണുവാന്‍ സാധിക്കുന്നതാണ്. നരസിംഹ മൂര്‍ത്തി, സിദ്ധി വിനായക, രേണുക യെല്ലമ്മ, ആദി മുക്തി നാഗ തുടങ്ങിയവരെ കൂടാതെ നൂറ്റിയേഴോളം ചെറു നാഗരൂപങ്ങളും ഇവിടെയുണ്ട്. കൂടാതെ, ഈ ക്ഷേത്രത്തിനു സമീപസ്ഥമായി വേറെയും നാല് ക്ഷേത്രങ്ങള്‍ കൂടിയുണ്ട്. ശിവന്‍, സിദ്ധി വിനായക, നരസിംഹ മൂര്‍ത്തി, നീലാംബിക എന്നിവരാണ് ഈ ക്ഷേത്രങ്ങളിലെ പ്രധാന പ്രതിഷ്ഠകള്‍.
മുക്തിനാഗ ക്ഷേത്രത്തെ സംബന്ധിച്ചുള്ള ഐതീഹ്യ പ്രകാരം ഈ ക്ഷേത്രത്തിനു ഇരുനൂറിലേറെ വര്‍ഷങ്ങളുടെ പഴക്കമുണ്ട്. അക്കാലത്തു ഇവിടുത്തെ പ്രദേശവാസികളുടെ ആരാധനാമൂര്‍ത്തി നാഗദൈവമായിരുന്നു. ജൂഞ്പ്പഹയിലു എന്നായിരുന്നു അക്കാലത്തു ഈ സ്ഥലം അറിയപ്പെട്ടിരുന്നത്. നാഗ ദൈവത്തെ ആരാധനയോടെ വിളിച്ചിരുന്നതു ജൂഞ്ചപ്പ എന്നായിരുന്നു. തങ്ങളുടെയും തങ്ങളുടെ ഗ്രാമത്തിന്റെയും സംരക്ഷകനായാണ് നാഗദൈവത്തെ അവര്‍ കണ്ടിരുന്നത്. തങ്ങളുടെ വിശ്വാസത്തെ സംരക്ഷിക്കുന്ന രീതിയിലുള്ള നിരവധി അനുഭവകഥകളും ഇവിടുത്തെ പഴയ തലമുറയ്ക്കു പങ്കുവെയ്ക്കാനുണ്ട്. ഇവിടെയുള്ള ചിതല്‍പുറ്റില്‍ ഇപ്പോഴും നാഗങ്ങള്‍ വസിക്കുന്നുണ്ടെന്നും ഈ ചിതല്‍പുറ്റിനെ 90 ദിവസം തുടര്‍ച്ചയായി ഒമ്പതു തവണ വലംവെച്ചാല്‍ മനസ്സിലാഗ്രഹിക്കുന്ന കാര്യങ്ങള്‍ നടക്കുമെന്നുമാണ് വിശ്വാസം.
ബെംഗളൂരുവില്‍ നിന്നും മൈസൂരിലേക്കുള്ള റോഡില്‍ റാമോഹള്ളിയ്ക്കു അടുത്തായാണ് ക്ഷേത്രം സ്ഥിതി ചെയ്യുന്നത്. ബെംഗളൂരുവില്‍ നിന്നും കെംഗേരിയിലെത്തിയാല്‍ എളുപ്പത്തില്‍ ക്ഷേത്രത്തില്‍ എത്തിച്ചേരാന്‍ കഴിയുന്നതാണ്. കെംഗേരിയില്‍ നിന്നും റാമോഹള്ളിയ്ക്കു പോകുന്ന ബസില്‍ കയറിയാല്‍ ക്ഷേത്രത്തിലെത്തിച്ചേരാം.