നീലക്കുറിഞ്ഞിപ്പതിപ്പ് പുറത്തിറക്കി വനം-വന്യ ജീവി വകുപ്പ്

വനം-വന്യ ജീവി പ്രസിദ്ധീകരണമായ അരണ്യം മാസികയുടെ നീലക്കുറിഞ്ഞിപ്പതിപ്പ് വനം വകുപ്പ് മന്ത്രി കെ രാജു പ്രകാശനം ചെയ്തു. മുഖ്യ വനപാലകനും വനം വകുപ്പ് മേധാവിയുമായ പി കെ കേശവന്‍ ആദ്യ പ്രതി ഏറ്റുവാങ്ങി. 12 വര്‍ഷത്തിലൊരിക്കല്‍ മൂന്നാര്‍ മലനിരകളില്‍ വിരിയുന്ന വസന്തമായ നീലക്കുറിഞ്ഞി ഈ വര്‍ഷം വിരിയുന്ന പശ്ചാത്തലത്തിലാണ് അരണ്യം ജൂലൈ ലക്കം നീലക്കുറിഞ്ഞിപ്പതിപ്പ് തയ്യാറാക്കിരിക്കുന്നത്.

ത്രിമാന സവിശേഷതകളോടയാണ് കവര്‍ പേജ് ഒരുക്കിയിരിക്കുന്നത്. കുറിഞ്ഞി പൂക്കളെ സംബന്ധിച്ച ശാസ്ത്രീയവും സമഗ്രവുമായ വിവരങ്ങള്‍, കേരളത്തില്‍ കണ്ടുവരുന്ന 46 ഇനം കുറിഞ്ഞിപ്പൂക്കളുടെ വിശദാംശങ്ങള്‍ തുടങ്ങിയവ ബഹുവര്‍ണ്ണ ചിത്രങ്ങള്‍ സഹിതം കുറിഞ്ഞിപ്പതിപ്പില്‍ ഉള്‍പ്പെടുത്തിയിട്ടുണ്ട്. വനം വകുപ്പിന്റെ വെബ്‌സൈറ്റായ www.forest.kerala.gov.inലെ പബ്ലിക്കേഷന്‍ എന്ന ലിങ്കില്‍ കുറഞ്ഞി പതിപ്പ് ലഭ്യമാണ്.

ലോക പരിസ്ഥിതി ദിനത്തില്‍ സംസ്ഥാനമൊട്ടാകെ നടന്ന പരിപാടികളുടെ ചിത്രങ്ങള്‍ ഉള്‍പ്പെടുത്തിയ ‘ഹരിതം’ ഫോട്ടോ ആല്‍ബത്തിന്റെ പ്രകാശനവും മന്ത്രി നിര്‍വഹിച്ചു. സാമൂഹിക വനവത്കരണ വിഭാഗം മേധാവി കെ എ മുഹമ്മദ് നൗഷാദ് ആദ്യ പ്രതി ഏറ്റുവാങ്ങി. വനം മന്തിയുടെ ചേംബറില്‍ നടന്ന ചടങ്ങില്‍ ഫോറസ്റ്റ് മാനേജ്‌മെന്റ് വിഭാഗം എ പി സി സി എഫ് എ കെ ധര്‍ണി, വനം വകുപ്പ് ഉദ്യോഗസ്ഥര്‍ ചടങ്ങില്‍ പങ്കെടുത്തു.