ഭിന്നശേഷിക്കാര്‍ക്ക് വിനോദസഞ്ചാരമൊരുക്കുന്ന സ്‌പെഷ്യല്‍ കെയര്‍ ഹോളിഡേയ്‌സ്
ഭിന്നശേഷിക്കാര്‍ക്ക് വിനോദസഞ്ചാരമൊരുക്കുന്ന രാജ്യത്തെ ആദ്യസ്ഥാപനമായ സ്‌പെഷ്യല്‍കെയര്‍ ഹോളിഡേയ്‌സ് ഈയാഴ്ച പ്രവര്‍ത്തനം തുടങ്ങും. 150ലേറെ വരുന്ന ഭിന്നശേഷിക്കാരായ വിനോദസഞ്ചാരികളുടെ സംഘത്തിന് ഈ ശനിയാഴ്ച ആലപ്പുഴയില്‍ ഒരുക്കുന്ന ഹൗസ് ബോട്ട് സഞ്ചാരത്തോടെയാണ് ടൂറിസത്തിന് ഏറെ പ്രാധാന്യമുള്ള കേരളത്തില്‍ത്തന്നെ ഇത്തരമൊരു ടൂര്‍ ഓപ്പറേറ്റിംഗ് സ്ഥാപനത്തിന് തുടക്കമാകുന്നത്. ‘ഇത് എന്റെ സ്വപ്നസാഫല്യമാണ്.
2004 മുതല്‍ ഞാന്‍ ഭിന്നശേഷിക്കാര്‍ക്കുള്ള ടൂറിസം എന്ന സ്വപ്നത്തിനു പിന്നിലായിരുന്നു,’ മുപ്പതു വര്‍ഷമായി വീല്‍ചെയറില്‍ ജീവിക്കുന്ന സ്‌പെഷ്യല്‍കെയര്‍ ഹോളിഡേയ്‌സ് സ്ഥാപകന്‍ സൈമണ്‍ ജോര്‍ജ് പറഞ്ഞു.
ഭിന്നശേഷിക്കാര്‍ക്ക അനുയോജ്യമായ വാഹനം, പ്രത്യേക പരിശീലനം ലഭിച്ച കോ ഓര്‍ഡിനേറ്റര്‍മാര്‍, ഡോക്ടര്‍മാര്‍, നഴ്‌സിംഗ് സ്റ്റാഫ്, വീല്‍ചെയര്‍ ഉരുട്ടിക്കേറ്റാനുള്ള റാംപുകള്‍, മോട്ടോറെസ്ഡ് വീല്‍ചെയറുകള്‍, ലിഫ്റ്റുകള്‍, ഭിന്നശേഷിക്കാര്‍ക്കുപയോഗിക്കാവുന്ന ഹോട്ടല്‍റൂമുകള്‍, ടോയ്‌ലറ്റുകള്‍, ബ്രെയിലി, സൈന്‍ ലാംഗ്വേംജ് മെറ്റീരിലിയലുകള്‍, സൈനുകള്‍ തുടങ്ങിയ ഒട്ടേറെ സന്നാഹങ്ങളും, സൗകര്യങ്ങളുമുള്ള വാഹനങ്ങള്‍ സ്‌പെഷ്യല്‍ കെയര്‍ ഹോളിഡേയ്‌സില്‍ സജ്ജമാക്കി കഴിഞ്ഞു.
ലോകമെമ്പാടുമായി വീല്‍ചെയറില്‍ സഞ്ചരിക്കുന്ന ആളുകളില്‍ 50 ലക്ഷത്തിലേറെപ്പേര്‍ വിനോദസഞ്ചാര തല്‍പ്പരരും അങ്ങനെ യാത്ര ചെയ്യുന്നവരുമാണ്. അരയ്ക്കു താഴെ തളര്‍ന്നതിനാല്‍ കഴിഞ്ഞ 30ലേറെ വര്‍ഷമായി വീല്‍ ചെയറില്‍ ജീവിക്കുന്നതിന്റെ ഭാഗമായി നടത്തിയ ഗവേഷണങ്ങളാണ് ഇത്തരമൊരു സ്ഥാപനം പ്രൊമോട്ടു ചെയ്യാന്‍ സൈമണ്‍ ജോര്‍ജിന് പ്രേരണയായത്.
ശാരീരിക, മാനസിക പരിമിതികള്‍ വിനോദസഞ്ചാരം ഉള്‍പ്പെടെയുള്ള ജീവിതാസ്വാദനത്തിന് തടസ്സമാകേണ്ടതില്ലെന്നാണ് അദ്ദേഹത്തിന്റെ അഭിപ്രായം.
ഭിന്നശേഷിക്കാര്‍ക്കുള്ള ടൂറിസത്തിന്റെ പ്രചാരണത്തിനായി കേന്ദ്രസംസ്ഥാന സര്‍ക്കാരുകളേയും ഇദ്ദേഹം പ്രേരിപ്പിച്ചു വരികയാണ്. കേരള സര്‍ക്കാര്‍ ഈയിടെ മുന്‍കയ്യെടുത്ത റെസ്‌പോണ്‍സിബ്ള്‍ ടൂറിസത്തിനു കീഴില്‍ ആക്‌സെസിബ്ള്‍ ടൂറിസത്തെക്കൂടി കൂട്ടിച്ചേര്‍ക്കാനും അദ്ദേഹത്തിനു കഴിഞ്ഞു.
സ്‌പെയിനില്‍ നിന്നുള്ള ഒരു ഭിന്നശേഷി യാത്രാസംഘം ഓഗസ്റ്റില്‍ ഇന്ത്യ സന്ദര്‍ശിക്കാന്‍ താല്‍പ്പര്യമറിയിച്ചു കഴിഞ്ഞു. മൂന്നു മാസത്തിനകം തന്നെ ഡെല്‍ഹിയില്‍ ഓഫീസ് തുറക്കാനും സ്‌പെഷ്യല്‍ കെയര്‍ ഹോളിഡേയ്‌സിന് ഉദ്ദേശമുണ്ട്. ബുക്കിംഗിന് 81296 01425; 62821 22596.